ونسيت أنى زوجة سلوى عليبه ٢
نظرت لها شهد بإستفسار وقالت .:.فى إيه؟
أجابت إيمان بحيره …..:
أصلنا ياستى هنروح يوم الخميس عند أسمهان .إتصلت ببابا وصممت إننا نروح نقضى خميس وجمعه معاها ونورين هتكون عندها وطبعا الخميس عندى سيكشن دكتور رزق وبالمنظر ده هيعاند معايا لو لقانى غبت وممكن ينزلنى فى العملى وانتى عارفه أنا الدرجه معايا بتفرق عشان الترتيب ……
تكلمت شهد ببراءه …..:
خلاص روحيله المكتب وإستأذنى منه زى أى حد مابيعمل وهو مش هينزلك فى العملى ….
نظرت لها إيمان وهى تحاول أن تستشف ما وراء كلماتها فقالت بحذر …:
.يعنى إنتى عايزانى أروح استأذنه …
أومأت شهد برأسها وقالت :
أيوه ماهو مفيش غير كده ……
وقفت إيمان مرةًواحده وقالت بشجاعه مزيفه .:
..أروح إيه المشكله يعنى هياكلنى ولا هياكلنى …
ذهبت إيمان فى طريقها تحت نظرات شهد المشجعه إياها ….وجدت من يوقفها ويقول ….:
.دكتوره إيمان ممكن كلمه ؟
نظرت إيمان لمن يتكلم وجدته رامز فارتبكت وقالت …:
خير يادكتور أظن مفيش بينى وبين حضرتك كلام ….
.وقف رامز أمامها وقال …:
ممكن أعرف إنتى ليه رفضانى إيه اللى مش عجبك فيا ؟
تلفتت إيمان حولها وهى خائفه أن يراها رزق وهى واقفه معه ولم تكن تعلم أنه رآها بالفعل وكان يود الهبوط إليها ولكنه قرر أن يتابعهم تحت نظرات الغيره الشديده …
إيمان بارتباك …:
.أولاإنت زميل زى أى زميل ولو إنت واخد بالك هتعرف إنى مليش علاقه بأى شاب فياريت تحترم رغبتى دى ومتكلمنيش تانى وأظن المرة اللى فاتت حضرة الظابط أحمد فهمك كده …….
وجدت إيمان شهد قد أتت وهى مكفهرة الوجه .
..إقتربت من رامز وقالت …..:
.إييييييه أنت عايز تتهزأ تانى ولا إيه …بتليفون واحد أجيبلك أحمد خطيبى هنا يظبطك ..؟؟
.إبعد عن إيمان أحسنلك وروح لشلة الأُنس بتوعك وروح للبت الصفرا اللى عنيها هتطلع عليك …يلا يابابا وسيبنا فى حالنا …….
تركهم رامز وهو يكز على أسنانه من الغيظ وقال ..:
..مااااشى انا وانتى والزمن طويل يا إيمان …..
أحتضنت إيمان شهد وقالت حبيبتى حبيبتى …بس انتى عرفتى ازاى انه وقفنى انا بصيت عليكى لقيتك مديرالى ضهرك ..
قالت شهد بمرح …..:
أسكووووتى هو إنتى متعرفيش …!!
نظرت اليها إيمان بإرتياب وقالت …:
لا معرفش خييير …..
إبتسمت شهد بخبث وقالت …..:
.أصل دكتور رزق هو اللى إتصل وقالى تقريباً كده شافكم من الشباك …..
