حكايات اسما السيد فاتورة كرامة أمي
أمي بصتله باستغراب.
— حساب إيه يا ابني؟
مدلها الورقة.
— اتفضلي، دي فاتورة الشهر اللي قعدتيه عندنا.
أمي أخدت الورقة، وبدأت تقرا.
وشها اتغير فجأة.
قربت منها بسرعة، وخدت الورقة من إيدها.
ولقيت مكتوب:
فاتورة إقامة السيدة أم ندى
إيجار غرفة الضيوف لمدة شهر: 4000 جنيه.
استهلاك الكهرباء والمياه: 1000 جنيه.
الإجمالي: 5000 جنيه.
فضلت باصة للورقة ثواني، مش قادرة أستوعب.
وبعدين رفعت عيني لحسام.
— إيه ده؟
رد بكل هدوء:
— فاتورة إقامة والدتك.
قلت وأنا حاسة إن الدم بيغلي في عروقي:
— فاتورة إيه يا حسام؟ إنت بتاخد من أمي إيجار؟
قال:
— وأخد ليه لأ؟ هي قعدت شهر كامل، واستهلكت كهربا ومياه، ونامت في أوضة لو كنت أجرتها لحد كنت استفدت منها.
حسيت إن الأرض بتلف بيا.
— إنت بتتكلم عن أمي كأنها نزيلة في فندق؟!
رد ببرود مستفز:
— بلاش عواطف يا ندى، الدنيا حسابات.
قلتله:
— طب والست اللي كانت بتصحى طول الليل مع بنتك؟ واللي كانت بتعملك أكلك وتغسل هدومك وتنضف بيتك؟ دي مش خدمات تستحق مقابل؟
ابتسم بسخرية.
— دي حاجات طبيعية، هي جاية تساعد بنتها.
بصيت لأمي.
كانت واقفة ساكتة، ودموعها متجمعة في عينيها.
وفجأة فتحت شنطتها وطلعت محفظتها.
بدأت تعد الفلوس بإيديها اللي كانت بتترعش.
وقالت بصوت مكسور:
— خلاص يا بنتي، متزعليش نفسك، هدفعله اللي هو عايزه.
جريت عليها ومسكت إيدها.
— لا يا ماما! مش هتدفعي جنيه واحد!
لكن حسام مد إيده وقال:
— يا جماعة خلصونا، أنا مستعجل.
في اللحظة دي حسيت إن قلبي اتكسر.
مش علشان الفلوس.
علشان كرامة أمي.
الست اللي ربتني وتعبت عشاني، واقفة قدامي بتتحاسب على إنها جت تطبطب على بنتها.
بصيت لحسام وقلت بهدوء غريب:
— عندك حق يا حسام.
ابتسم.
— أهو ده الكلام العاقل.
كملت:
— فعلًا الدنيا حسابات، وكل واحد لازم ياخد حقه.
قلت لأمي:
— استنيني عشر دقايق يا ماما.
ودخلت أوضتي.
فتحت اللابتوب، وبدأت أكتب.
كنت محاسبة قبل ما أبقى أم، وعارفة كويس إزاي أعمل كشف حساب مفصل.
بعد عشر دقايق خرجت ومعايا ورقتين.
حطيتهم قدام حسام.
قلتله:
— اتفضل، دي فاتورة الخدمات اللي أمي قدمتها لينا الشهر اللي فات.
ضحك باستهزاء.
— إيه الهبل ده؟
قلت:
— اقرأ بس.
مسك الورقة.
وكان مكتوب فيها:
فاتورة خدمات منزلية ورعاية طفلة
رعاية طفلة رضيعة لمدة 180 ساعة خلال الشهر، بسعر 100 جنيه للساعة: 18000 جنيه.
