حكايات اسما السيد “حامل من جوزك”1
— يا مساء الفل على أجمل دكتورة في مصر!
قرب مني وباس خدي.
اتجمدت.
لكنه ماخدش باله.
— جبتلك باستا الجمبري اللي بتحبيها. عارف إنك أكيد ما أكلتيش كويس.
حط الأكل على السفرة، ودخل يغير هدومه.
فضلت واقفة مكاني.
إزاي راجل يقدر يمثل الحب بالشكل ده؟
وإزاي أنا ماكنتش شايفة أي حاجة؟
رجع وقعد قدامي.
— مالك يا ياسمين؟
— مفيش.
— شكلك تعبان.
— يوم صعب.
ابتسم وقال:
— طب بكرة خدي إجازة، ونخرج نتفسح.
بصيتله فجأة.
— آسر… إنت نفسك يبقى عندك طفل؟
استغرب السؤال.
— إيه اللي فكرك بالموضوع ده دلوقتي؟
— جاوبني.
مسك إيدي.
— طبعًا نفسي. بس مش على حساب زعلك.
— ولو عرفت إن ممكن يبقى عندك طفل من غيري؟
اتغيرت ملامحه للحظة.
كانت لحظة صغيرة جدًا.
لكن أنا شفتها.
— يعني إيه الكلام ده؟
— سؤال افتراضي.
سحب إيده ببطء.
— ياسمين، إحنا اتكلمنا في الموضوع ده مليون مرة. إنتِ أهم عندي من أي حاجة.
ابتسمت ابتسامة موجوعة.
— حتى من ابنك؟
وشه شحب.
— ابني؟!
وبعدين ضحك ضحكة متوترة.
— هو إنتِ بتحلميني ولا إيه؟
ما رديتش.
كمل أكل، وحاول يغير الموضوع.
لكن طول العشا كان بيتجنب يبص في عيني.
وبعدها دخل ينام.
أما أنا، ففضلت قاعدة جنبه في الضلمة.
براقب أنفاسه المنتظمة.
وبسأل نفسي إذا كنت هقدر أواجهه بالحقيقة.
لكن حاجة جوايا كانت بتقولي:
استني.
لسه فيه سر.
الساعة كانت اتنين ونص بعد نص الليل.
آسر كان نايم بعمق.
مديت إيدي ناحية موبايله الموجود على الكومودينو.
فضلت ثواني مترددة.
عمري ما فتشت في تليفونه.
ولا هو فتش في تليفوني.
لكن اللي حصل النهارده خلاني أحس إن حياتي كلها بقت علامة استفهام.
فتحت الموبايل بالرقم السري اللي كنت عارفاه.
دخلت على الواتساب.
دورت على اسم تاليا.
ما لقيتوش.
دورت في المكالمات.
برضه مفيش.
كنت خلاص هقفل الموبايل، لما لفت نظري تطبيق مراسلة تاني.
فتحته.
وكانت أول محادثة ظاهرة باسم غريب:
ملف 47
دخلت عليها.
أول رسالة كانت من الدكتور فؤاد مدير المستشفى:
“لازم ننهي الموضوع قبل ما لجنة المراجعة توصل. البنت بدأت تطلب فلوس أكتر.”
وتحتها رد من آسر:
“أنا قلتلك من الأول إننا بنلعب بالنار.”
حسيت قلبي بيخبط في صدري.
نزلت لتحت.
رسالة تانية من فؤاد:
“تاليا مش هتتكلم طول ما إحنا منفذين الاتفاق.”
وبعدين رسالة من آسر:
“ولو ياسمين عرفت؟”
الرد جه بعدها بدقيقتين:
