نوڤيلا جديدة ومختلفة جداااا . يالا ورونى التفاعل . نصف جميلة وكنت أنت لى قدرًا وكنت أنا لك النصيب. وكنت أنت لى عشقًا وكنت أنا لك الحبيب.وكنت أنت لى داء وكنت أنا لك الطبيب. وكنت أنت لى كالماء وكنت أنا لك اللهيب . فلا تكن قدراً موجعًا،ولا عشقًا خادعًا،ولا دواءً لاذعًا،وكن ماءًا رقراقًا عذبًا يطفئ لهيب عشقى فأنا بعشقك لازلت طامعًا. #خواطر #سلوى عليبه الفصل الأول .. لم يكن لى يد بما يحدث لي .فلقد كان قدرًا راضية به أنا.ولكني أبدا لم أسلم من نظرات الجميع وكأن مايحدث لى بملئ إرادتي. إعتزلت العالم حتى يتناسوا وجودي. وهيهات إن حدث هذا .فالجميع لا يسأل الا عليّ أنا وكأن محبتهم قد زادت ولكنها لم تكن أبدا محبة بل كانت شفقة أو كما يقولون " شماته" . من أنا ؟ كما يقولون لكل حظ من إسمه أو عكسه .وكنت أنا من كانت لها حظ من إسمها بأول حياتها وبعكسه الآن .فكيف ذلك؟ سأروي لكم : أنا جميلة ليست صفة ولكن إسمى هو" جميلة" وقد كنت كذلك جميلة الوجه والخلق . الجميع كان يضرب بى المثل فى كل شئ وفوق ذلك متفوقة بدراستى .أى كنت كما يقولون الفتاة المثالية . حتى أن بعض أقاربي كانوا يخافون من وجودي فى التجمعات حيث أنى سأخطف الأنظار ولن يهتموا بأى فتاة أخرى. ولأن كل ذي نعمة محسود وكنت أنا والحمد لله فى نعمة فأصبح الآن وقت الإبتلاء . أصبت بمرض البهاق والحمد لله ولحكمة يعلمها الله أتى فى نصف وجهى والنصف الآخر كما هو وكأن ظل ليذكرنى كيف كان شكل وجهي قبل هذا المرض . ومنذ تلك اللحظة ورغم رضائى بقضائى ومن أنا لأعارض إبتلاء جاء ليطهرني .ولكن كان للجميع رأى آخر .منهم من أبتعد عني حتى اصدقائى ومنهم من ينظر لي وهو مشفق عليّ دون أى مراعاة لمشاعر قد يحطمها تأملهم المستفز لي . حتى أن هناك من نصحنى بإرتداء النقاب .ورغم عدم معارضتى للفكرة لو كانت الظروف مختلفة الا أنى رفضته رفضًا تامًا تلك المرة .فأنا لن أرتديه لكى أخفى وجهى لما به من مرض .فارتدائي له من وجهة نظري بوقت كهذا هو إعتراض على قدري ،وأنا لست معترضة ،بل حامدةً لله على فضله . فرغم صعوبته إلا أنه أظهر جميع من حولي حيث لم يتبق غير من أحبني بصدق وتعامل معي لجمال خُلُقي وليس جمال خِلقتي. ياجمييييله ،انت يازفته . أغلقت مذكراتي لأرد على صديقتي المقربة أو الوحيدة التى ظلت بجواري بعد ما حدث معي "تقوى" كالعادة فأنا أعلم ماتريده فهى تريد أن نخرج معًا . تعمل دائمًا على إخراجي مما أنا فيه .وصدقًا أنا لا أرفض فأنا لا أحب الإعتزال او عدم المواجهة. نععععم يا بنتى فيه إيه ؟ هكذا أجبت عليها بعد خروجى من غرفتى . إبتسمت فى وجهي وهى تقول: ياختى على العيون القمر دى . ما تسلفيهوملى لفة وحياة أبوكى ياشيخة. ضحكت بشدة عليها وأنا اقول: يابنتى دى الحاجة اللى فاضلة فى وشى مظبوطة عايزه كمان تاخديهم . إقتربت مني لتأخذنى بأحضانها دون كلام . أتعلمون شيئًا فأنا أقول لها هذا لكى تحتوينى بهذا العناق،فأشعر به بحنان فائض وكأنها تداوي جراحي ، تروي صحراء قلبي المقحلة من سخرية الجميع سواء بكلماتهم أو بأعينهم . وكعادة كل مرة عندما نخرج . نجد من السخرية والضحك أحيانا والقليل من النظرة التى تشعرك بالحب . جلسنا بمقهى على النيل عندما أتى الينا النادل فهو يعرفنا منذ أيام الجامعة . أحضر ماطلبناه عندما سألتنى تقى فجأة: جميلة إيه رايك لوتشتغلى ؟ نظرت إليها بسخرية : لا والله .وده إزاى حضرتك .انت عارفه انى من اوائل دفعتى وواحده كورسات ورغم كده محدش راضى يشغلنى . أجابتها تقى بحماس : بصي فيه مركز طبي كبير للعلاج النفسي وعايزين وجوه جديدة وشابة وعندهم حماس وطرق جديدة للعلاج .وانت ماشاء الله عليكِ .ايه رأيك؟ نظرت إليها بتردد وأجبتها بخفوت: طب ازاى هيقبلوا بيّ وأنا كده . ربتت على يدى وهى تبتسم بثقة: تعرفى بقه انك وانت كده هتتقبلي بسرعة .لأنك انت نفسك هتكوني علاج لما حد يشوف صبرك ورضاكي باللى انت فيه وانك متقبلاه ،ساعتها انت نفسك هتكوني علاج ليهم ولحالاتهم . إنتهينا من النزهة وكل رجع لمستقره إلا أنا .فرجعت بجسدى ولكن عقلي مشغول بما أخبرتنى به تقى . جلست بغرفتي وأنا تنتابنى الحيرة . دق بابي ومن غيره والدي الحبيب والذى يعرفني من نظرة عيني وبالتأكيد علم أن هناك شيئا بداخلي. فتحت بابي لأبي وأنا أرتمي بأحضانه فكما يخبرني دومًا أن هذا مكاني ولن يأخذه أحد . أخذنى من يدي ليجلس بجواري على تختي وهو يقول : هاه مالك بقه؟ أخبرته بما أخبرتني به تقى . فنظر إليّ بحب وقال: وانت ايه رأيك؟ أجبته بحيرة : مش عارفة .محتارة وخائفة . تنهد بقوة وقال: أكلمك بصراحة. أومأت إليه دون كلام . فأكمل بتأثر: كنت دائما بخاف عليكي بسبب جمالك .وفى نفس الوقت بتباهى بيكى وسط الكل .مش عشان شكلك جميل لا عشان أخلاقك اللى لما الكل بيتعامل معاكى يقول يا زين ماربيت يا سامي بنتك جميله رغم جمالها وأخلاقها لكن متواضعة وبتحب الكل وروحها زى العسل. ضحك للذكرى وقال: كنت برد وأقول ماهى عسل فى كل حاجة . زفر بهدوء وقال: لغاية ما حصل معاكى اللى حصل .كنت خايف عليكى لتقعي بس كالعادة اثبتي للكل انك مختلفة لما واجهتي وكملتى الدبلومة بتاعتك وكمان الماجستير .بس اللى زعلنى انك بتواجهي الكل الا عيلتك .بتهربي منهم . ويمكن الشغل ده جه فوقته عشان تطلعي وتكملي حياتك العملية وتثبتي للكل انك مفيش حاجة غيرتك ولا هزتك وانك فعلا راضية بقضاء ربنا . إغرورقت عيناي بالدموع وكيف لا أفعل وانا أمام هذا الكم من الحنان والثقة . نظرت لعيني أبي وأخبرته بهدوء: أنا فعلا بواجهة الكل ماعدا عيلتي لأنهم المفروض هم اكتر ناس تقف جنبي .لكن يابابا العكس هو اللى حصل .وأديك شفت حتى خالتو اللى كانت دائما تطفش أى عريس لأنى هكون للدكتور نائل إبنها ومجرد ما حصل كده ليا اتنصلت من الكلام وقالت أصل نائل هيسافر ومش عايز يرتبط دلوقت .ضحكت بسخرية وأكملت : وفوجئنا كلنا أنه خطب قبل مايسافر واهو دلوقت اتجوز ومراته حامل .يبقى عايزنى اواجهم ازاى بس . دخلت والدتى هى الأخرى وأخذتنى بأحضانها وقالت: أنا سمعت كلامك بس احب اقولك أن أنتِ اللى خسارة فى نائل أبو ضب ده . ضحكت على كلامها وكذلك ابي .فأكملت أمي : انت هتوافقي على الشغل ماشى .مش بنتى اللى تستخبي وكمان مالك مانت زى القمر أهو فيكِ ايه يعنى .شوية بقع فى جنب وشك اليمين وإيه المشكلة .يابنتى اللى ميحبش روحنا وأخلاقنا قبل شكلنايبقى ملوش لازمة فى حياتنا. نظرت لأبي ولأمي ،هل يوجد مثلهم فى هذه الحياة لا أعتقد .فاهتمامهم الوحيد كان منصب عليّ أنا وأخي وبعد سفر أخى واستقراره خارجا فأصبح كل اهتمامهم بى .فأنا اعشقهم وبشدة . ها أنا ذا أقف بين يدي خالقي .اساله المشورة كما عودنى أبي . صليت إستخارة بعد أن أديت فرضى ثم قرأت وردى من القرآن الكريم وذهبت فى ثبات عميق . وها أنا أمشى بطريق به شوك ولكن هناك بابًا امامي فذهبت إليه وطرقته حتى فتح لي شخص لا أعرفه ولكن ماهذا الجمال .فإن كان هو هكذا فكيف كان جمال يوسف عليه السلام . لم ينظر إلي ولكنه اتجه داخلا فدخلت خلفه حتى جلس على مقعد أثير فاقتربت منه ومددت له يدي ولكنه لم يلتقطها فمددتها مرة أخرى ولا اعلم لما يوجد عندى مثل هذا التصميم .فظل يرفضها مرارا حتى التقطها ففرحت بداخلي فوجدته يلبسنى خاتما ذهبيا رااائعا لم ارى بروعته . استيقظت وأنا لا أعرف ماهذا الذى رأيته ولا من هذا الشخص غير أن قلبي يخفق بشدة كلما تذكرت وجهه الجميل. وجدت نفسى أتصل على تقى لأبلغها بموافقتى على الالتحاق بهذا العمل وأنى سالتقى بها غدا للذهاب معها إلى هناك . أقف أمام هذا الصرح .فهو ليس مركز طبى صغير إنه مركز كبيير بمساحة خضراء كأنه قطعة من الجنة . قابلت المسئول عن هذا الصرح وكان طبيبًا فى الخمسين من عمره .على وجهه بشاشة ودماثة خلق . نظر إليّ ولأول مرة أرى نفسى طبيعية بنظرة أحدهم . وافق على عملى عندما رأى الشهادات التى بحوزتي . ولم يتطرق أبدا لمرضى ولا لهيئة وجهى بل كان مبتسما دائما. أعمل هنا منذ أسبوع .وجدت نفسى بهذا المكان ،فالجميع يعاملننى بحب وزادهم هذا تعاملى معهم . فالجميع عندى سواء من أطباء للممرضات وحتى العاملات . زادنى عملى ثقة وقوة حتى انى لم أعد ارى وجههى كما يرونه الجميع وهذا بفضل من حولى بهذا الصرح الرائع .فلقد عالجوا قلبي قبل أن اعالجهم أنا . مررت بحجرة دكتور سالم مدير المركز وهو اسم على مسمى .وجدته يجلس حزينا فسألته بإهتمام : مالك يادكتور ؟ أجابنى بحزن: حبيب ابن أخويا عمل حادثه وأثرت على عينه ومش راضى يتقبل الواقع وأنا بعترف انى فشلت كطبيب معاه. رددت عليه بحزن عليه: طب فين باباه واللى حواليه عشان ميحسسهوش أنه لوحده . أجابنى بحزن أشد : حبيب ده حكاية لوحده . وضعت كف يدى تحت صدغى وقلت له : كلي آذان صاغية يا دكتور . إبتسم وهو يقص عليّ حكاية هذا الحبيب بداية من إسمه الغريب والجميل أيضا.قال لى : حبيب ده يبقى ابن اخويا الكبير . باباه حارب الكل عشان يتجوز مامته والكل كان رافض لأن مامته كانت بنت السواق بتاع بابا الله يرحمه . بس هى كانت سبحان الخلاق جماال رهيييب . وبعد محاربات اتجوزوا وللأسف اكتشف أن عندها عيب خلقي فى القلب وصعب تخلف وصعب أصلا تتحمل الجواز . بس هم صمموا واتجوزوا وهو منعها من أنها تحمل ولأنها بتحبه أكتر ماهو بيحبها حملت ومعرفتوش غير بعد مابقى الحمل خطر أنه ينزل وفى نفس الوقت خطر أنه يستنى . أكمل بحنين للذكرى : وفضلت فى المستشفى لغاية ما ولدت وسبحان الله قبل ماتولد أخويا راح لشيخ وقعد يعيط ويقوله أن الدكاترة بيقولوا انها بنسبة 9٩% مش هيقدروا ينقذوها . يومها الشيخ قاله داووا مرضاكم بالصدقة وفعلا قعد يطلع فلوس لله بكمية رهيببه ويطلب من الكل يدعيلها .وسبحان الله ولدت وربنا نجاها والدكاترة بقوا مستغربين لأن حالتها كانت مستحيله. سمى أبنه حبيب لأنه رمز للحب اللى بينه وبين مراته .وفى سبوع حبيب قرر يعمل المركز الطبى ده ويخلى جزء منه مجاني عشان اللى مش قادر يتعالج . كنت أنظر إليه وعيناي مغرورقتان بالدموع لوجود مثل هذا الحب .نظرت إليه ليكمل . أكمل وصوته متحشرج إثر كتمانه للبكاء: وحبيب عنده 5سنين مامته تعبت جامد واتوفت وأخويا من زعله عليها اتوفى بعدها بكام شهر بعد ما وصانى على حبيب. كنت أنا متجوز بقالى سنتين ومعايا حمزة ابنى عنده يادوب سنه . أخدته وفعلا بقى هو ابنى الكبير ويعلم ربنا انى بحبه وبفضله عن ولادى .لانه ذكرى أخويا وابنى اللى ربيته . سألته بتأثر : طب هو عمل حادثة إزاى؟ رد بحزن: بالعربية بتاعته .كان نازل متأخر وعمل حادثه وللأسف فى قزاز دخل فى عينه وأثر عليها. ظللت طول يومى متأثرة بكلام دكتور سالم .خاصة عندما عرفت أنه مهندس ويعشق عمله .أى أن عيناه هى أساس عمله . مضى أكثر من ثلاثة أيام .كنت أود أن أسأل دكتور سالم عليه ولكنى خجلت من ذلك. حتى وجدت حركة غير طبيعية فى المشفى .وهناك من يجرى هنا وهناك . ويطلبون من قسم الجراحة طبيب على وجه السرعة . نعم فالمركز كان متكاملاً أى أنه ليس للعلاج النفسى فقط ،بل هو قسم فيه . أوقفت واحدة من الممرضات لأسألها ماذا هناك ؟ فقالت لى أن هناك شاب قد دخل لغرفة العمليات بسبب جرح نافذ بذراعه وقد نزف كثيرًا وكل من بالمشفى يسرعون إليه. أصبت بالإندهاش ولكن ما حالي أنا بهذا ؟فلأذهب لعملي . ذهبت لعملي وبدأت أمارس جلسات العلاج الجماعية والفردية التى اقوم بها . فهنا وجدت نفسي بالفعل. ولكن ولغرابة الأمر وجدت صديقتى "تقى" وهى تأتى عليّ. فهى منذ أن عملت بالمشفى لم تأت لى ولا مرة ؛بل نتقابل بعد العمل طبعا على حسب ظروف بيتها فهى متزوجة ومعها طفل. قمت إليها وعلى وجهى علامة الإندهاش ولكن وجدت وجهها حزين. رحبت بها ثم سألتها مباشرةً: إيه سر الزيارة دى ياترى ؟ أجابتنى بحزن شديد : أنا هنا مع مروان . نهضت بسرعة وانا اقول بقلق: مروان جوزك ماله تعبان ولا إيه ؟ يابنتى اتكلمى ؟ أجابتنى سريعًا: يابنتى مروان كويس فيه إيه بس .د صاحبه . كنا مع بعض بنشترى طلبات للبيت بعد ما سيبنا أرغد عند ماما .جاله تليفون أن حبيب صاحبه وقع واتعور جاامد وكان بينزف ومش راضى يروح المستشفى .فروحناله وجينا على هنا. انتبهت لكلامها وقلت: حبيب ده يبقى بن اخو دكتور سالم صح . اومأت بموافقة وقالت: أيوه .انت ناسيه أن مروان مهندس وهم الاتنين أصحاب وكمان مروان أصلا داخل بنسبة بسيطة فى الشركة اللى فاتحها حبيب . وغير كده مروان أصلا اللى قالى انى اقولك على الشغل هنا. أكملت بحب أخوى صادق: انت عارفه مروان بيعتبرك زى أخته بالظبط وبيعزك قووى. إبتسمت بهدوء وانا اقول: فعلا مروان بالنسبه ليّ زى أخويا وكفاية أنه جوز أختى وكمان كفاية أنه مبعدكيش عنى رغم انك اتجوزتى وبقى ليكى بيت وطفل .ربنا مايحرمنى منكم أبدا . نهضت مرة واحدة وأمسكت يدها وأنا أخبرها أن علينا الذهاب لدكتور سالم لنطمئن على ابن أخيه. يالا هجوووم الفصل الثانى ... ولما كنت أنت صفحة فى كتاب حياتى وسيترتب عليها باقى الحكاية، ذهبت إليك دون إرادة منى ويا لخوفي من النهاية؛ فهل ستؤتي محاولاتي بثمارها، ام كأني أقوم بزرع صبار فى صحراء دون سقاية؟! خواطر : سلوى عليبه 🩷🩷🩷🩷🩷🩷🩷🩷🩷🩷🩷🩷🩷🩷 ذهبت بطريقي ولا اعلم لمَ يدق قلبي .ولكن كل ما أعلمه أنى اود الذهاب لرؤية هذا "الحبيب". وجدت دكتور سالم وهو يتحدث مع الطبيب بقلق بالغ. ذهبت إليه بعد أن توجهت تقى لمروان زوجها. وقفت جوارهم دون حديث حتى أنهى طبيب الجراحة حديثه. فنظرت لدكتور سالم وانا أقول: مالك يادكتور .دكتور الجراحة طمنك خااالص اهو وبيقولك أن رغم النزيف اللى حصل بس الجرح كويس ومش عميق والحمد لله أنه جه فى دراعه. زفر دكتور سالم وقال: يا جميله المشكله أنه رافض أى مساعدة . تخيلى أنه مشى كل اللى فى البيت معاه ولولا عم خليل البواب رفض يمشى مكنش حد حس بيه . أكمل بحزن: د لولا معاه نمرة مروان مكناش عرفنا اللى حصل . ربت على كتفه وأنا أقول : هو لازم له مساعدة وحضرتك عارف . تحدث بيأس: للأسف مفيش دكتور قدر يوصل معاه لحاجه خااالص . لمْ أعلم لمَ أجبته وقلت: ايه رأيك أجرب أنا يا دكتور يمكن أقدر اعمل اى حاجة. نظر إليّ ولسان حاله يقول وكيف ستقدرين على شئ لم يستطع الوصول إليه أكثر المعالجين النفسيين . إقترب منا مروان وتقى وقد إستمعوا لحديثنا .فقال مروان متحمسًا : فعلا يا دكتور سالم .كده كده مفيش حد جاب معاه نتيجة .خلاص نسيب جميلة تجرب ،وإن شاء الله تقدر تعمل اللى غيرها معملهوش. نظر إلينا دكتور سالم وقال بتخوف: أنا خايف عليها يا مروان انت عارف صاحبك عصبي ومحدش بيقدر عليه وبعد الحادثة عصبيته زادت بزيادة . رددت عليه بكل ثقة : ياريت حضرتك تسيبلي الفرصة دى ،لو قدرت كان بها ،مقدرتش يبقى خلاص اهى محاولة. وافق دكتور سالم على أن أتولى علاج "حبيب" النفسى . فقررت أن أبدأ فورًا دون تأجيل. استأذنت منهم جميعا وودعت تقى ثم ذهبت لغرفة هذا المريض الصعب. دخلت عليه بهدوء فكان مغمض العينين .اقتربت منه بحذر .وبدون إرادة منى أخرجت شهقة شقت صدرى. يا الهى إنه هو من رأيته برؤياي. كيف هذا ؟! تصنمت مكانى فلم أقدر على الإقتراب ولم أقدر على الرجوع . حتى تحدث هو وقال: مين هنا فى الأوضة ؟ يالصوته الرخيم المميز ببحة رجولية تأثر القلب. لم أجبه فأنا بالفعل بحالة من الذهول حتى أكمل وقال: لو حد من الممرضين أو الدكاترة ياريت يتفضل يطلع بره ،لأنى مش عايز حد معايا لو سمحتوا. ورغم صوته الهادئ الا أنه كان محتدًا قليلًا وكأنه يحاول أن يتحدث دون عصبية . أجليت صوتى وتحدثت بهدوء: وحضرتك مش عايز ليه حد من الدكاترة ولا الممرضين .هى مش دى وظيفتهم برضه ولا ايه ؟ فتح عيناه المغلقة وياليته مافتحها . انها كبحر من القهوة الممزوجة بالشيكولاة السويسرية الفاخرة . هل يوجد به شئ غير جميل ؟ لا والله إنه يجعلك دون إرادة تقول : سبحان المبدع. رد عليّ بعصبية وقال: وانا مش عايز حد معايا .ايه هو بالعافية ؟ وجدت نفسى دون تفكير أقول له : عشان إنت جبان. إعتدل على سريره ونظرات الغضب تخرج من بحر القهوة خاصته وقال: نععععم مين ده اللى جبان يامجنونة انت. ماذا هل نعتنى بالمجنونة . وجدت نفسى أضحك وانا أحدث نفسي وأقول : وماله مجنونة مجنونة مش مهم هبقى أعالج نفسى . زاد صراخه وهو يقول: بتضحكى على إيه يامتخلفة انت ِ؟ اقتربت منه بشدة وتحدثت بقوة: أولا أنا لا مجنونة ولا متخلفة وياريت تحترم نفسك وانت بتكلم اللى قدامك .ثانيا بقه أنا لسه عند كلمتى وانك جبان. ساد الصمت قليلا قبل أن يقول بغضب: تعرفى عنى إيه عشان تقولى عليّ جبان . سعدت بداخلي فأنا كنت متوقعه أن يرفض الحديث معى ولكن كونه رد على سؤالي فهذا معناه أنه تجاوب معى .نعم فتلك هى طريقتى معه للعلاج .وهى المواجهه. أجبته بثقة: أعرف عنك اللى محتاجة أعرفه .ومنها انك مهندس شاطر فى شغلك وعندك عمك وعيلتك اللى بتحبك .وانك عصبي ومبتسمحش لحد يقرب منك . أجابنى بسخرية وقال: ونسيت اهم حاجة إنى أعمى مبشوفش .صاح بغضب : فاهمة يعنى ايه مبشوفش .بس انت هتفهمى ازاى وانت مش حاسه بيّ ولا بوجعي . ضحكت أنا تلك المرة وقلت بثقة : ومين قالك انى مش فاهمة وجعك. بس تقدر تقولي ايه اللى حصل عشان ده كله ؟ لم أنتظر منه إجابة وأكملت أنا: أقولك أنا : انت اه اتعميت بس عندك أصحاب ممكن يساعدوك .صحيح انت مهندس وعينك مهمة فى شغلك بس ممكن تقول تصورك للحاجة وحد قريب منك ينفذها. بس ليه تعمل كده ،طبعا لازم تشيل الكل ذنب اللى حصلك . تخلى واحد زى دكتور سالم حزين وبيمووووت عشانك . اصحابك اللى بيحاولوا يطلعوك من اللى انت فيه تبعدهم عنك . ارتفع صوتي وأكملت : إيه يعنى اللى حصلك على الأقل انت ليك عمليه ممكن تتعمل وتشوف بعدها بس حضرتك اللى رافض .عرفت بقى ليه بقول عليك جبان يا باشمهندس. صاح بغضب: لا انت متعرفيش حاجة.متعرفيش يعنى ايه تحسى بنظرات الشفقة من اللى حواليكي. رددت عليه دون وعى : على الأقل انت بتحسها لكن أنا بحسها وبشوفها .تعرف أنا لو كنت اتعميت كان عندى أهون من اللى بيحصلى . على الأقل ساعتها مش هبعد أصحابى عنى لو حاولوا يساعدونى ،هحاول أقف من تانى عشان عيلتى . ممكن أحس فعلا أنهم بيشفقوا عليّ بس لما يلاقونى كملت مش هحس بده منهم . بدل مانا بشوف نظرة إشمئزاز ياريتها تكون شفقة وانا هبقى مبسوطة . تصدق انت فى نعمة مش حاسس بيها. صمت حل على المكان لا أسمع غير صوت أنفاسي المتلاحقة وكذلك أنفاسه هو . وجدت نفسي أخرج من الغرفة دون كلام .حتى أنى ذهبت لمنزلي دون الرجوع لدكتور سالم مرة أخرى . احتللت غرفتي ولم أسمح لأحد بالدخول عليّ. فلأول مرة تتملكني الحيرة واللوم .نعم ظللت ألوم نفسي على ما خرج من فمي من كلمات. فكيف أقول لشخص أعمى أنت بنعمة بعد أن كان يرى النور؟ كيف أصف ظلامه بالنعمة ؟ نعم هو للراضي بقضاء الله نعمة ولكن هو ساخط ،يريد يدًا تخرجه من صحراء سخطة لنعيم الرضى بقضاء الله . وكانت حيرتي بسبب كلماتي عن نفسي . ظللت أفكر وافكر .كيف سأواجهه غدا؟ ولكني رغم ذلك رددت على نفسى بأنى لابد أن أكمل الطريق .وتذكرت رؤياي وأن طريقي له ملئ بأشواك الصد من جانبه ولكني سأظل أمد يدي مرارًا وتكرارًا حتى يلتقطها. ذهبت لعملي فى اليوم التالي وجدت دكتور سالم بإنتظاري وعندما رآنى أشار لي أن أتبعه لغرفة مكتبه. وقفت أمامه كالمذنبة فبالتأكيد قد إشتكى منى ابن أخيه ومن الممكن أن يعفيني من علاجه النفسى. كنت أنكس رأسي ارضًا حتى قال لي: مالك فيه إيه؟ نظرت إليه وقلت بهدوء: منتظره كلام حضرتك. وياللعجب لقد وجدت إبتسامة على وجهه ثم قال: أنتِ متعرفيش أنا مبسوط إزاى،إمبارح حبيب مبطلش كلام عليكي. ضحك بقهقهة وقال: هو صحيح كلام مش لذيذ يعنى بس كون أنه اتكلم كده عنك حتى لو بعصبية يبقى انتِ لفتي انتباهه وكده يبقى هو ممكن يستجيب معاكى بسهوله. وقف من على كرسيه ثم اتجه إليّ وهو يقول: تعرفى أن اى دكتور كان بيروحله "حبيب" مكنش بيرد عليه أصلاً لغاية الدكتور مايعتذر . عشان كده أنا موافق على اى حاجة هتعمليها معاه .المهم أنه يتكلم ويطلع اللى جواه وساعتها ممكن نقنعه أنه يعمل العملية. خرجت من مكتب دكتور سالم وأنا أشعر بالسعادة. نعم فسأظل خلف هذا الحبيب حتى يستجيب. أنهيت عملي أولًا وتعمدت ألا أذهب إليه إلا متأخرًا.طرقت بابه وانا اعرف انه لن يسمح لأحد بالدخول .ولكن رغم هذا فتحت باب الغرفة ودخلت عليه فكان يجلس بأريحيه يضع ظهرة على قائمة التخت وكأنه يفكر بأمر ما. لم يتحرك من مكانه ولكنه قال بفظاظة: قلت مش عايز حد يدخل عندى. جلست بجوارة بهدوء وأجبته : عادى مش كل حاجة انت تقولها احنا ننفذها. إعتدل على تخته عندما سمع صوتي وقال بإندهاش : أنا قلت أن عمى وصلك الرسالة انى مش عايز اشوف وشك تانى خاصة لما اتأخرتى قلت بقه دى عندها دم ومش جاية. ورغم أن حديثه أصابنى بالإحباط ولكني لم أشعره بذلك وأكملت : كل مرة بتخلينى أتأكد انك جبان .طب حتى غيرلى فكرتى وبعدين أبقى أمشى. ثار بشدة وقال: أنا مش جبااان سامعه مش جبااان. أجبته ببرود : والله صريخك ده مش هيغير فكرتي عنك .انت قدامى انسان جبان وبتهرب من المواجهة ولو انت فعلا مش كده خلاص اتكلم معايا قولى على اللى جواك ،واجه الكل باللى تعبك ،قولهم أنا مش هعمل العملية عشان كذا وكذا .أكملت بنفس اللا مبالاه : هاه هتعمل كده ولا مش هتقدر . كانت نظراته لى حية رغم عدم رؤيته، ولكنها نظرات يخرج منها الغضب حتى شعرت أنه لو كان يرانى لقتلني بيده. رد عليّ بغضب: انت شكلك كده باردة وفاضية وموراكيش حاجة غيري ،وانا بقه كلامك ده مش هيجيب معايا نتيجة. رددت ببرود: اوك تمام . بس انت كده مش بس جبان لا دانت جبان وضعيف كمان . صرخ بقوة : إطلعى برة ومتجيش هنا تانى . انتفضت من قوة صوته ولكنى تماسكت أمامه وأنا أقول: تمام أنا هخرج بس هاجى بكرة وبعده عشان حتى أتعرف على كل صفاتك .يعنى أنا جيت امبارح عرفت انك جبان ،النهارده ضفت ليهم ضعيف.فهنشوف بكرة بقه هتبقى ايه الصفة التالته . اتجهت للباب وأنا أقول له بلامبالاه رغم الإنتفاضة بداخلة : سلام يا هندسه. خرجت مسرعة عندما سمعت صوت شئ يقذف بإتجاه الباب .بالتأكيد أخرج غضبه بأى شئ . وجدت أمامي دكتور سالم وهو يقهقه ويقول: الصراحه رغم إن نرفزته دى مخلياه صعبان عليّ بس أنا مبسوط منها لانه شويه شويه يا يخنقك يا يطلع اللى جواه. ابتسمت بشدة وأنا أسأله بتوجس : طب وبما انك عارفه قووى كده ماتقولى ايه الاحتمال الأكبر؟ إبتسم وقال بمكر: هيخنقـك . وضعت يدى على رقبتى وأنا ابتلع رمقى وأقول: ربنا يطمنك يا دكتور. ظلت الأيام تتوالى ولا يوجد جديد .فهو عنيد ولا يلين أبدا. فحتى الحديد يلين بالإنصهار أما هو فصلد جلمود . ولكنى لم استسلم أبدًا. كانت تقى تحدثنى بالهاتف عندما جاء زوجها فأخذ منها الهاتف وأخبرنى كيف أن صديقة يتحدث عنى بكل ضيق وأنه غاضب مني جدااا ومن إصراري .ولكن الغريب أنه أخبرني أن هذا شئ صحي لأن طبيعة "حبيب" هى اللامبالاة ،فعندما يريد أن يبتعد عن شخص ما أو يبعده عنه فإنه يتجاهله ولكن ما يفعله معى دليل على تأثيري به. فرحت كثيرًا لكلامه .حتى أنى قررت أن أفعل شيئاً مختلفًا بالغد . إستسقظت وكلي نشاط .وذهبت لعملي تحت دعوات أبي وأمي لي وفرحتهم ظاهرة بعيونهم لتغيير حياتى وانطلاقي مرة أخرى. ذهبت لدكتور سالم وأخبرته بما أريد .وافق على مضض ولكن لا يهم ،المهم الموافقة وقد أخذتها. وكانت خطتى هى أن أتركه لبضع أيام ولا أذهب إليه حتى أرى ماذا سيحدث وهل سيشعر بغيابى أم سيفرح لذلك. فهو عنيد ويعلم أن الكل يحاول ارضاؤه فأصبح كالطفل الصغير كلما أعطيته شيئا رماه بعيدا وطلب شيئا آخر .إذا فلنبتعد عنه ولنرى. رغم هذا فقد غلبنى قلبى وكنت أذهب إليه بعد إنتهاء دوامي وأنظر إليه قليلا ثم أتركه دون كلام .كنت أذهب إليه أثناء غفوته التى أعلم وقتها جيدا بسبب الأدوية التى يأخذها. ظللت على هذا الأمر لمدة 4 أيام كاملة . حتى بعث ورائى دكتور سالم فذهبت إليه .وجدته يجلس على مقعده ثم نظر إليّ وأمرني بالجلوس . تحدث دون مقدمات وقال: أنا عايزك ترجعى تعالجى " حبيب" من تانى. نظرت إليه بعدم فهم وقلت له: أنا أصلا متخلتش عن علاجه .بس كل الحكاية هى فترة حبيت أبعد فيها عشان أشوف رد فعله لما يحس بالانتصار انى خلاص مش هدخله تانى زى ماهو عايز. نظر إليّ بخبث وقال: ولو قلتلك أنه تقريبا بيسأل عنك كل يوم بس من غيرما يبين يعنى أنه بيسأل. فتحت عينى على آخرها من شدة إندهاشى وقلت: نععععم حضرتك بتقول ايه ؟ د بيبقى عايز يطردنى كل مرة ،يبقى ازاى بيسأل علي يعنى مش فاهمة الصراحة. أجابنى بهدوء لئيم: هو "حبيب" كده .مبيحبش يظهر أنه محتاج حد ويمكن دى اكتر حاجه تعبته بعد الحادثة أنه غصب عنه بقى محتاج حد يساعده. نهضت من مكانى وقلت : تمام إن شاء الله هدخله النهاردة. ذهبت من أمامه وحيرتى تأكلنى .لماذا يسأل عنى أن كان لايريد بقائي؟ أكملت عملى رغم تشتت ذهنى ثم اتجهت صوب غرفته وقلبى كطبول الحرب من كثرة دقاته. نعم كنت أراه كل يوم ولكن لا أتحدث معه،فلا أنكر أنى توحشت نبرة صوته الرخيمة وبحور القهوة خاصته. دققت الباب فلم يرد كالعادة .ضحكت بداخلي ثم قمت بفتح الباب مرة واحدة ودخلت إليه. وجدته تلك المرة يقف أمام النافذة وكأنه بالفعل يرى مايحدث بالخارج . ألقيت السلام فرد عليّ بهدوء وهو مازال معطيًا لي ظهره. كانت نبرته هادئة عما توقعت.فلم أعرف بماذا يفكر؟ اقتربت منه وأنا أقول: يعنى لا زعقت ولا قلتلى اطلعي بره زى كل يوم . إستدار لي وقال بهدوء: مش يمكن قررت أتكلم عشان تريحينى منك . إبتسمت بهدوء وقلت: يعنى بجد عايز ترتاح منى؟ شعرت به وقد أجفل من سؤالي ؟ فأكملت متعمدةً: وكمان ما نا كنت مريحاك منى بقالى كام يوم . شعرت به وكأنه ينظر إليّ ،فشعرت بأن أنفاسي محبوسة داخل صدري وزاد إنحباسها عندما قال: بس انت مريحتنيش ولا حاجه ودليل كده انك كنت بتيجى كل يوم وانا نايم. الفصل الثالث.... و لا يقودنى إليك غير قلبى ومن غيره... أجفلت أنا تلك المرة ولكنى تمالكت نفسي وقلت له: ومين قالك بقى المعلومة الخطيرة دى ؟ إبتسم بسخرية وقال: إنت ناسية إنى أعمى ولا إيه !والأعمى بتزيد عنده حاسة السمع والشم لأنه بيعتمد عليهم . أكمل بما زادنى إرتجافًا : كنت بحس بخطواتك لأنها مختلفة عن خطوات أى حد تانى،وكنت بشم ريحتك لما تقربي مني .ولو غلطان قولي. إبتلعت ريقى بقوة ثم حاولت أن أجلي صوتي وقلت له: عادى انت المريض بتاعي وكنت بحب اطمن عليك بنفسى . اتجه صوب مقعد بجانب تخته ثم جلس عليه وأشار على مقعد آخر وهو يقول : اتفضلى لأن الكلام بينا شكله هيطول. اتجهت للمقعد الذى أشار إليه وسألته بهدوء : ليه مخرجتش؟ أجاب بإمتعاض: عمي رافض إنى أخرج دلوقت .وأنا حبيت اريحه مش أكتر . نظرت إليه وعندى شعور قوى بأنه يكذب ولا اعلم لماذا؟ وجدته يقول بسخرية: بتبصيلى كده ليه ؟ شهقت بقوة وانا أسأله: عرفت إزاى ؟ قهقه بشدة ويالجمال ضحكته جعلتنى أتوه أكثر وأكثر . أخرجني من توهانى صوته وهو يقول: أصلى بكلمك وانت مردتش يبقى ايه اللى حصل انك كنت سرحانه فيا. ثقته بنفسه جعلتنى أشعر بالضيق فقلت بغضب: ومين قالك ؟كل الحكاية انى كنت بدرس تفاصيل انفعالاتك لأنى حاساك بتكذب. ٱقترب بوجهه منى ورغم أنى متأكده بعدم رؤيته لى الا أن وجههى أصبح يضخ نيرانًا إثر قربه هذا .قال لى بهدوء: يعنى أنا دلوقت بقيت جبان ،ضعيف وكمان كذاب . ماذا يفعل بي ؟ هل هذا أسلوبه الجديد لكى يجعلنى أرحل أما ماذا؟ سألته دون مقدمات : انت بتعمل معايا كده ليه؟ أجابنى بسخرية إستشفتها من خلال كلامه: بعمل إيه ؟ أجبته دون مواربه: شويه عصبى وتزعق ودلوقتي هادى وعايز تتكلم ! ممكن افهم فيه إيه ؟ وضع كفيه على وجهه دليلا على ضيقه ثم أكمل : انتِ عايزه إيه بالظبط ؟ أجبته بهدوء: عايزه أعرف ليه بتعمل كده ؟ زفر حبيب بقوة ثم قال: يمكن لانى تعبت . كل شوية عمى يجيبلى حد عشان يعالجنى بس للاسف هم اللى عايزين يتعالجوا .مجرد ما اسكت أو مردش يزهقوا ويمشوا . أكمل بهدوء: بس إنتِ غير ، صبرتِ على عصبيتي ومستسلمتيش رغم أن تقريبا بقالنا أكتر من 10 أيام واحنا نفس الأسلوب . إنتظرت أن يكمل ولم يخذلني فعلا وقال: وغير كده ال ٤ أيام اللى انت غيبتيهم كنت حاسس ان فيه حاجه مهمه ناقصانى واتضح أنها مناكفتى وبرودك هم اللى كانوا ناقصنى. وقفت مرة واحدة وقلت: أنا مش باردة . أجابنى حبيب بإبتسامة: زى مانا عمرى ماكنت لا ضعيف ولا جبان ولا حتى كذاب. إبتسمت لإبتسامته وقلت له : خلاص نتفق أننا نفتح صفحة جديدة وتبدأ تطلع اللى جواك. نظر بشرود وقال: اللى جوايا صعب أنه يطلع لحد. إبتسمت وأنا أقول له: إعتبرنى الهوا وانت بتكلمه ماشى وصدقنى هسمعك كويس ولو ملقتش نفسك مرتاح وانت بتحكى ابقى اسكت تمام . إبتسم بهدوء وقال: تمام.ها مستعدة تسمعى . أومأت له وقلت : مستعده جدااا .يلا نبدأ. سألنى بتيه لاحظته عليه: عايزانى أبدأ منين؟ أجبته بثقه: من اى مكان انت حابب تتكلم عنه . تركنى واتجه للتخت واستلقى عليه ثم أغمض عيناه بعد أن عقد يديه علي صدره وقال: منكرش أن عمى سالم بيظهرلى حبه فى كل وقت بس إحساسى باليتم كان أقوى منى ،كنت بشوف طنط لبنى وهى بتعامل حمزه وحلا بحنيه كان نفسى أبقى زيهم .اه منكرش أنها كانت حنينه معايا بس طبعا مع ولادها غير. صمت قليلًا وانا احترمت ذلك. حتى أكمل وقال: كانت نظرات الشفقة من الكل حتى المدرسين بتوعى بتقتلنى. كرهت يتمى وكرهت الحب نفسه. سألته دون تردد : إزاى كرهت الحب ؟وهو الحب ماله ؟ أحابنى بحزن شديد: لأن الحب هو اللى خلى ماما تصمم أنها تخلفنى رغم تعبها عشان بتحب بابا.وبرضه الحب ده هو اللى خلى بابا ميقدرش يعيش بعد ماما ويتوفى بعدها بكام شهر من حزنه عليها. رأيته وهو يمسح دمعة منزلقة من عيناه وكأنه لايريدنى أن أراها . زفر بشدة وقال: مفكرش حتى أنه هيسيبنى لمين ؟ طب لو كان عمى وحش كان حصل إيه ؟ عرفتى ليه كرهت الحب. أجبته بهدوء: أولا دى أعمارهم ،يعنى حتى لو باباك كان بيكره مامتك فبرضه كان هيموت فى نفس الوقت لأن ده عمره. هو بس تعددت الأسباب والموت واحد . إبتسم بسخرية وقال: مانت لازم تقولى كده . أجبته بإبتسامة وثقة : لا طبعا . بس فعلا الحب ملهوش ذنب فى موت باباك ومامتك. بالعكس د خلى ليهم ذكرى اللى هى انت . تخيل كده لو حب مامتك وباباك مانتصرش ومكنوش اتجوزا ساعتها كان حصل ايه؟ كنت انت مجتش الدنيا ولا خلدت ذكراهم ولا عمك كان واخدك عوض لأخوه اللى فقده فى عز شبابه ولا كان أهل مامتك شافوا فيك بنتهم اللى اتوفت . أكملت بثقة بعد أن وجدت صدى كلماتي على وجهه : باختصار انت كنت انتصار للحب ده والثمرة اللى كبرت قدام الكل وراعوها كلهم بحبهم واهتمامهم . إعتدل بجلسته وقال: انت ليه بتهونى كل حاجه كده وبتبسطيها . ولا ده من صميم شغلك ولا دى شخصيتك ولا إيه ؟ أجبته بإبتسامة : أولا دى شخصيتى قبل مايكون شغلى . أنا كده بحب كل حاجه بسيطه وأحب أشوف الحاجة الحلوة وسط الشئ الوحش. ويمكن ده اللى ساعدنى فى شغلى وخلانى أنجح فيه فى فترة قصيرة . أجابنى بسخرية : يمكن لأن حياتك حلوة وماشيه بطبيعيه . ومحصلش معاكى حاجه تخليكي تفكرى بطريقة مختلفه. أجبته تلك المرة بتهكم: تفتكر . نهضت مرة واحدة ثم قلت له: كفاية النهاردة كده .نكمل بكره أن شاء الله .أنا اصلا اتأخرت. رجعت إلى منزلى وأنا أفكر لماذا شعرت بالغضب من كلماته. فهو بالفعل لايرانى فكيف سيعرف ما بوجهي . فأنا أرى نظرات الجميع بالمشفى ولكنهم وللحقيقة يتعاملون معى بطبيعة. دخلت أمى علي وأنا جالسة على اختي أفكر. سألتنى بحنان ماذا بي؟ قصصت عليها كل ماحدث معي منذ بداية رؤياي حتى الآن . حتى شعورى نحوه .وجدتها تنظر إليّ وتقول: حبتيه ؟ نظرت إليها بسخرية وقلت: ولو حصل ياماما تفتكرى يعنى هستغل أنه مبيشوفش وأخليه مثلا يحبنى .ثم إنه اصلا بيكره الحب . أجابتنى بحنان: أنا كل اللى يهمنى هى انتِ ومش حاباكى تتوجعى وعشان كده بقولك لو هتتعلقى بيه أكتر يبقى تبعدى ومتكمليش معاه علاج. نظرت إليه باستغراب وانا أقول: بس ده مااستجابش مع حد غيرى. زفرت بقوة ثم أكملت : متقلقيش ياماما أنا هعرف أتحكم فى نفسى كويس وكمان أنا عارفه حدودى لغاية فين. خرجت والدتى من غرفتى واتصلت على تقى وتحدثت معها كالعادة حتى سألتنى ماذا بي؟ وكالعادة أجبتها بما فى داخلى .ولكن كان الصمت حليفها ولم تقل لى غير جملة واحدة: خلى بالك من نفسك ومحدش عارف العوض فين يا جميلة. ذهبت إلى عملى فى اليوم التالى وأمضيته بنفس الروتين حتى جاءت موعد جلستى معه . فذهبت إليه ولكنى لم أجده . فسألت عليه إحدى الممرضات فأخبرتنى أنه بالحديقة . ذهبت إليه فوجدته يجلس بالحديقة وهو يستمع لموسيقى هادئة وهو مغمض العينين .ولكن الغريب أننى حينما اقتربت منه ٱعتدل بجلسته وقال: عرفتى مكانى من الممرضة ولا ايه ؟ ابتسمت بخفة وقلت: أيوه . هاه .هنكمل هنا ولا تدخل أوضتك . أجابنى بهدوء : هتتضايقى لو قلتلك نكمل هنا. جلست بمقعد بجواره وأنا أقول : لا طبعا .أنا كمان بحب الطبيعة . أجابنى يتهكم: بس يابختك انت شايفاها لكن أنا بسمعها واسمع صوتها بس. أجبته بهدوء : صدقنى الإنسان ساعات بيقفل عينيه عشان يعيش التأمل والسلام النفسى ده . ضحك بسخرية وقال: أنا بقى عايش التأمل على طوووول . سألته بمباغته: طب ليه متستمتعش بجمال الطبيعة مع صوتها وريحتها. سألنى يترقب: وده إزاى أن شاء الله . أجبته بثقة: توافق انك تعمل العملية .وزى ماقلت انك لا جبان ولا ضعيف ولا كذاب .يبقى تثبت للكل ده مش ليّ أنا بس . وغير كده انت مش هتخسر حاجة . سألنى بحزن ازاى مش هخسر حاجه؟ أجبته بإطمئنان : انت كده كده فقدت النظر يبقى لما تدخل تعمل العمليه لو لاقدر الله منجحتش يبقى انت مخسرتش حاجه بس هتكون أثبت للكل انك حاولت وعملت اللى عليك وانك مش عايز منهم نظرة شفقه تانى .فهمتنى . تحدث ومازال الحزن حليفه وقال: تعرفى انى مشيت من بيت عمى وصممت انى ارجع بيتنا وأعيش لوحدى من وانا فى أولى جامعة عشان مشوفش نظرة شفقة فى عين اي حد . أكمل بهدوء: كان كل ماحد يجى يزور طنط لبنى ويسلم علينا يقوم يجوا عندى ويقولوا هو ده حبيب يا حبيبى والله قلوبنا وجعاناعليه . إبتسم بسخرية وقال: ويقعدوا يقولولهم قد ايه أنه كويس أنهم مرمونيش وانهم بيربونى مع ولادهم . كنت ببقى مستني أن طنط لبنى ترد بس مكنش بيحصل . وساعتها حسيت ان حتى حنانها عليّ شفقة مش حب .فقررت أمشى وصممت وساعتها عمى بعت معايا واحد هو بيثق فيه عشان يروقلى الشقة ويطبخلى وطبعا عشان يعرفه أخبارى اول بأول . بس الحق يقال عمر عمى ما حسسنى بأنى يتيم أو انى مش ابنه . حتى ولاده حمزه وحلا كنت يعتبرهم اخواتى الصغيرين وبحبهم جدااا وهم كمان بيحبوني . زفر بقوة وأكمل وأنا أنصت وأدون : يوم الحادثه كنت متنرفز ومحدش عارف السبب . وللأسف مقدرش اقوله لحد . مكنتش شايف قدامى وحصل اللى حصل . الصراحه محدش سابنى والكل وقف جنبى بس شويه والكل بدأ يشوف أشغاله ومتبقاش حد فاضيلى . عمى عرض عليا أرجع البيت عنده بس مكنش ينفع خااالص. سألته يترقب: ليه مكنش ينفع؟ وليه كنت متنرفز ساعة الحادثة ومقلتش لحد؟ الفصل الرابع والأخير .. . ماذا أفعل بصوت حنون يجعلنى أبوح بما لا أريد أن أبوح به ،ولكنه سحر صوتك سيدتى... خواطر سلوى عليبه 💠💠💠💠💠💠💠💠💠💠 أجابنى بهدوء بارد عكس توقعى وقال: عايزانى أقولك إيه هاه .أقولك أن بنت عمى اللى بعتبرها أختى ومخطوبة وفرحها كان على الأبواب جت تعترفلى بحبها. أصابنى الذهول حتى أنى شهقت بصوت عالٍ. فقال بسخرية: ايه استغربتى ولا ايه؟ تصدقى قالتلى أنها اتخطبت مخصوص عشان أغير ولما ملقتنيش غيرت قررت تيجى وتعترفلى . ولما واجهتها وقلتلها أن خطيبها بيعشقها قالتلى بكل بساطه بس أنا بحبك انت وهو ميهمنيش. ساعتها محستش بنفسى غير وانا بضربها بالقلم ومشيت وسيبتها وحصل اللى حصل. سألته بترقب: طب ليه مقولتش لعمك؟ أجابنى بحزن :لانه مكانش ينفع أحطه فى الموقف ده بعد كل اللى عمله . زفر بألم: خاصة بقه لما عرفت أن اللى مكبره فى دماغها الموضوع هى مامتها طنط لبنى بمعنى أن ازاى بعد ما ربونى وكبرونى واحده تيجى تاخدنى على الجاهز، والسبب الرئيسي أن ليا النص فى كل حاجه بما انى الوريث الوحيد لبابا الله يرحمه .يعنى ميراثى قد ميراث عمى . أكملت بتصميم: يبقى انت لازم تعمل العملية وتعرف الكل انك قوى وانك انسان عايز تعيش حياتك مش حياتهم ، انسان من حقه يختار ويكمل حلمه بأن يكون عنده اكبر مكتب هندسى، مش ده حلمك برضه ؟ أجابنى بإبتسامة: ايوه حلمى وكنت بدأت أحققة بس للأسف . رددت عليه بقوة: للأسف ليه ،المكتب ولسه شغال ومروان بيعمل اللى يقدر عليه دغير كل المهندسين الموجودين ، يبقى انت لازم ترجع لحلمك. سألنى بتخوف: ولو العمليه منجحتش، يبقى الأمل اللى أنا عشت عشانه ضاع. اقتربت منه وقلت بإصرار: عيش بالأمل .ياما فيه ناس بيتمنوا أن لمرضهم علاج وكانوا سافروا بلاد عشان يجيبوه . انما انت علاجك جنبك ونسبة نجاحه كبيرة بس هو خوفك اللى مقيدك. ظلت جلساتنا يوميا كنت أبث فيه الثقة وكان يستجيب لي . أخبرنى بكل شئ عنه حتى تطرقنا للحديث فى مواضيع شتى .فاكتشفت أنه مثقف جدااا ومحب للفنون وبه الكثير من طباعي وأهم شئ أنه عاشق للقراءة مثلى . حتى أصبحت أقرأ ما يريد ثم أقصه عليه وأناقشه فيه وببعض الأحيان كنت أقرأ أمامه وكنت أشعر بسعادته حينما أفعل ذلك . حتى سألنى يوما دون مقدمات: بتؤمني بالحب ولا كلام عشان تعالجيني؟ أجبته بإبتسامة وأنا انظر لوجهه الجميل : أكيد طبعا، أكملت بحزن: بس للأسف الحب رفاهية مش الكل يقدر يلاقيه ولو لقيناه ساعات بيبقى صعب نحافظ عليه. سألنى بغتة: ليه؟ ليه منقدرش نحافظ عليه؟ اللى اعرفه إن الإنسان لما بيحب مبيهموش أى حاجة غير أن حبيبة يفضل جنبه وفى حضنه. إبتسمت بألم وأجبته: يمكن، بس مش كل الناس كده للأسف لأن الكل بيبص للمظهر قبل الجوهر، والإنسان بطبعه طماع وبيبقى عايز كل حاجة، شكل حلو وجسم حلو وشيك ومش مهم هى من جواها إيه؟! إقترب من وجهي وكأنه يرانى وقال بارك: معنى كده ان شكلك مش حلو؟ انتفضت بقوة وأنا اخبره: الجلسة خلصت وانا لازم أمشى! نهض هو الآخر وقال: ايه بتهربي من سؤالي؟ أجبته بحيرة: الإجابة هتفيدك بإيه؟ إبتسم بطريقة لم افهم معناها وقال: أصل الجوهر وصلنى خلاص فحابب اشوف المظهر شكله إيه؟ إقترب بشدة تحت أنفاسى المتلاحقة وهو يقول: مع إنه ميهمنيش فى حاجه بس فضول. نظرت إليه وقلت بخفوت: إنت بتعمل معايا كده ليه؟ وجه نظراته إليا وكأنه بالفعل يراني امامه وقال بنبرة هادئة أذابت قلبي: بعمل إيه؟ ركضت مسرعة دون الإنتظار لأى شئ حتى سمعته يقهقه ويقول: إهربي أهربي شكلك انت كمان محتاجه علاج وهيكون على إيدى. تنهد بقوة وقال لنفسه: مكنتش مؤمن بحاجة إسمها حب لغاية ماجيتى انت وكل شئ اتغير لدرجة أنى بقيت بشوف الدنيا بعيونك انت ونفسى افتح عشان أشوفك انت. حتى جاء موعد العملية .ظللت معه حتى أحفزه وكان الجميع بجواره رغم خجلي من كلماته والتى كان يلقيها ببراءة وكأنه لايقصد شيئا وكيف يقصد كل تلك الكلمات وهو لم ير وجهى بعد، ولأول مرة أشعر بخوفي من ان يرى احد وجهي؛ فأنا لن أستطيع تحمل نظرات الشفقة منه دونًا عن الجميع. دخل إلى غرفة العمليات وأخذ قلبي وروحي معه. ذهبت لغرفتي وتوضأت وصليت ودعيت حتى أن دموعى لم تجف . وظللت أدعو له أن يرى النور حتى لو كان هذا أخر شئ لأتمناه . فأنا لن أستطيع مواجهته.فمن المؤكد أنه قد رسم صورة بخياله لهيئتي ولا أريد أن أشوهها . نعم سأطمئن عليه وأترك عملى . فلن استطيع المواجهة. فأنا لست ضعيفة بل عاشقة .ولا اريد نظرة إشمئزاز بعيون من أعشق فعندها الموت عندى أهون . مرت العملية على خير وخرج الطبيب وهو سعيد لنجاح العمليه وتبقى النتيجة الأخيرة عند ازاله الضماد الطبي فى الغد . كنت أتقلب على التخت كالسمكه على النار . لم أستطع النوم . فذهبت لربي ودعوته فوجدت نفسي اقول: ياااارب أنا عارفه أن مفيش حاجه عندك مستحيلة .وقلبي مش بإيدى. انت وضعت حبه فى قلبي وأنا عمرى ما أسأت إستغلال الحب ده وقفلت عليه . أولا عشان معملش حاجة غلط وثانيا لانى مش عايزاه يكرهنى لما يشوفنى.بس برضه عايزها يشوف حتى لو اتحرم منه .ياارب نورله عينه وبصيرته . مضى الليل ثقيلا حتى أتى النهار بصعوبة .إستيقظت من نومى المتقطع وتجهزت واتجهت لعملي. قمت بروتين كل يوم حتى أتى ميعاد إزالة الضماد . وقفت بعيدا أنظر إليهم . حتى أزاح الطبيب الضماد بالكامل وسأله يترقب شايف إيه؟ ظل الجميع على أحر من الجمر وانا أكثرهم حتى أجاب بهدوء: مش شايف غير زغلله. تهلل وجه الطبيب وقال: الحمد لله .فتح بقى عينك شوية شويه كده . فعل مثلما أمره الطبيب حتى اعتاد على الضوء.ثم رفع كفيه ليراهم فنظر لجميع الحاضرين فكان عمه ومروان وصديق آخر والطبيب وحمزة ابن عمه . شعرت أنه يبحث عن أحد غيرهم .ولكنى لم أفكر كثيرا وذهبت لغرفة دكتور سالم وفتحتها ووضعت طلب إجازة لمدة شهر .نعم فأنا لم أستطع أن أقدم على الإستقالة .ولكنى قلت لتكن أجازه لمدة شهر وهو سيخرج من المشفى وسيندمج من جديد مع الجميع ولن يتذكرني. خرجت من المشفى واتجهت ل منزل تقى . التقطتني بأحضانها إثر انهياري . تركتنى أخرج ما بداخلي. سألتنى بصراحة: بتحبيه يا جميلة. زفرت بقوة وقلت لها: بحبه لا، أنا بعشقة ومش عارفه ليه ؟ أنا كنت قافله قلبى لانى عارفه أن محدش عمره هيرضى بواحده زيي ؛ عشان كده عمرى ما فكرت انى افتح قلبى لحد .الا حبيب قلبي تحسيه كان مستنيه وأول ماشافه فتح لوحده. تركت تقى بعد أن شعرت بالراحة ولو قليلا. ثم ذهبت لمنزلي . ومثل ما حدث مع تقى حدث مع والدتى والتى قالت لى: مفيش حاجه بعيدة على ربنا .وسبحان الله اللى تحسبيه مستحيل يكون هو أسهل السهل . كان يومى ممل جداا ولكن ما جعلنى أحزن بشدة هو عدم سؤال دكتور سالم عليّ ولو لمرة واحدة . مضى أسبوعًا من اجازتي كنت أحادث تقى يوميًا وكانت دون أن أسأل تقول لي أخبار حبيب والتى تعرفها عن طريق زوجها مروان . حتى قالت لى يوما : بقولك ايه ماتيجى نخرج نروح الكافيتريا بتاعتنا نقعد فيها شويه .مخرجناش من زمااان يا أمى يالا بقى نستغل الأجازه بتاعتك. ذهبت معها بعد إلحاح شديد .ولكن كان هناك شعور غريب بقلبي ؛وكأننى سأراه. ولكن كيف لا أعرف؟ أم أن هذا هو من فرط إشتياقى إليه؟ تقابلنا وتناولنا طعامنا ونحن نمزح مع بعضنا البعض رغم المزقلبى المبرح، حتى استأذنت تقى لدخول الحمام قبل أن نمشى من المقهى. ولكن لمَ أشم رائحة عطره،ولمَ أشعر بأنفاسه؟ وجدت من جلس أمامى وهو ينظر إليّ ولكن نظرته الآن حيه ،بها بريق لامع و لا أعلم هل هو بريق النور أم شئ آخر .ولكن من المؤكد أن عينيه زادت جمالاً .حتى هو هناك شئ مختلف به لا أعرفه. يا الله . تذكرت فجأة أنه الآن يراني أنه الآن يرى وجهى .فوضعت يدى على وجهى يتلقائية ولكنى سمعت صوته الرخيم يقول: ليه بتدارى عيونك عنى ؟ ماذا ؟! عن أى عيون يتحدث ؟ إنى أخفى قبح وجهى عنه وليس جمال عيناى. أزلت يداي وأنا أقول بدموع: يعنى انت عايز تقنعنى انك مش شايف وشي وشايف بس جمال عيونى. إبتسم بوجهى وقال: فيه واحده قالتلى قبل كده أن لازم أشوف الشئ الجميل قبل الشئ الوحش . إبتسمت بسخرية وقلت: وأديك شفت الشئ الجميل .ياترى هتقول إيه عن الشئ الوحش. نظر داخل عيونى وقال بثقة وصلت إليّ: مش شايفه . فعلا مش شايف أى شئ وحش . كل اللى أنا شايفة بنوته زى القمر .جه شويه بهاق فى نص وشها والنص التانى فضل زى ماهو عشان يقول للعالم قد ايه هى كانت جميله بس دلوقت بقت أجمل . لأنها مختلفه عن البشر . أكمل بحب داخل نظراته: مختلفة بطيبة قلبها وحلاوة روحها ومساعدتها للكل مهما عملوا فيها. حببت الكل فيها حتى أن واحد أعمى كان بيستنى الوقت اللى بتيجى فيه ولما تتأخر شويه يبقى هيتهبل . إقترب منى وقال بإبتسامة خلابة: تعرفى انى من تانى يوم سألت عليك الممرضات وبعدها بقيت بسأل عمى كده بالمحسوس .ابتسم بشدة وقال: بس على مين طلع فاهمنى . حتى أنى سألته على شكلك وعلى فكره قالي على كل حاجه .يعنى أنا من الأول وانا راسملك صورة بخيالى. تحشرج صوتى من التأثر وقلت: وطبعا الصورة دى أحلى بكتييير من اللى انت شايفه. إبتسم بسعادة وقال: هتصدقينى وانا بقولك أنك طلعت أجمل بكتييير مما كنت متوقع أو متخيل . بحبك . نعم ماذا قال ؟ هل قال أحبك ؟ لا لا غير معقول نظر إليّ مرة أخرى وقال : والله العظيم بحبك وعايزك تبقى شريكة حياتى .وعلى فكره سبب انى سيبك أسبوع بحاله فده عشان بس أقدر أطبع بعد العمليه وأول ما قدرت جيتلك على طول. . نظرت إليه بحزن وقلت: وهتستحمل كلام الناس وهم بيقولوا ازاى واحد زى القمر زيك ياخد واحده زيى. إبتسم بسعادة وقال: يعنى بتعترفى انى زى القمر. رددت بارتباك وقلت: هو ده بس اللى أخدت بالك منه فى كلامى. ضحك بقوة وقال : اه طبعا لان ميهمنيش بقيت كلامك . هتندم عمرى ماهندم . هتكرهنى .. لا هحبك أكتر.. ولادى ممكن ياخدوا المرض منى. كله بإيد الله هو حد ضامن نفسه. هتفضل تحبنى.. هفضل أحبك وأتباهى بيكَ وسط الناس كلها أن دى اللى رجعتلى حياتى ونفسى تكون هى كل حياتى. وجدت أبي وأمى حتى أخي جاء من سفره وتقى وزوجها ودكتور سالم وحمزه وصديق حبيب الآخر واسمه رحيم . والجميع يقولون : يالا بقى عايزين نفرح. اقتربت أمي منى وقالت: مش قلتلك مانتش عارفه العوض هيجى منين. نظرت إليها وقلت بفرحة ودموع: د طلع بيحبنى . ٱحتضنتنى وقالت: عارفه . لأنه كلمنا مجرد ماسيبتى المستشفى وملاقكيش .وقالنا أنه عارف بمرضك وأنه بيحبك وعايزك . نظرت لأبى فوجدته يبكى ويقول من فرحته : على فكره أنا وافقت فبلاش تصغرينى قدامه. إقترب أخى منى وبارك لى بحب . حتى دكتور سالم اقترب منى وقال: متفكريش فى اى حاجه ممكن تزعلك . قلبك الأبيض أجبر الكل أنه ينسى تشوه وشك ويفتكر بس رقة قلبك .وصدقينى بعد ماشوفت سعادة حبيب معاكى مستعد أعمل أى حاجة وأجمعكم ببعض . كفاية انك رجعتيله ضحكته من جديد . نظرت إليه وجدته ينزل على إحدى ركبتيه ويخرج خاتما رااائعا ويقول : تقبلي تتجوزينى . لم أشعر بنفسى غير وأنا أومئ بالموافقة ودموعي تنزل بغزارة . فقام وألبسنى الخاتم وتقى تزغرد بكل جهدها . حتى قال حبيب بمزاح : بص ياعمى المفروض بعد ماتقول موافقه أخدها بالحضن بس مينفعش عشان كده مش هتبقى خطوبه لا هيبقى كتب كتاب والفرح كمان شهر. وكنت أبحث عن الأمان حتى وجدته بين عينيك وداخل أحضانك .فكان تشوه وجهى هو ميزتى وكنت أنت فى عينى مثالا للجمال .... تمت .سلوى علييه. .
