حواديت اسما السيد 1
— يعني ممكن يكون محمود ونجلاء بيدوروا على شقة تانية… أو بيجهزوا لاتفاق مالي. لسه منعرفش.
سكت شوية وبعدين قال:
— بس أنا عرفت حاجة أغرب.
— إيه؟!
— نجلاء مقدمة طلب حجز شقة جديدة، ومحمود اسمه موجود في بيانات التواصل الخاصة بالطلب!
حطيت إيدي على صدري.
— يا نهار أبيض… يعني هو بيجهز لها شقة؟!
قال:
— احتمال، لكن متستعجليش الحكم. فيه تفاصيل لازم نتأكد منها.
في نفس الليلة، محمود رجع البيت وهو مبسوط بشكل غريب.
دخل الأوضة ولقاني بجهز شنطة هدومي.
وقف على الباب وقال:
— الله! إيه الجمال ده؟! يعني أخيرًا اقتنعتي؟
بصيتله وابتسمت.
— أيوه يا محمود، فكرت ولقيت إنك عندك حق.
قرب مني وقال:
— كنت عارف إنك عاقلة.
قلتله:
— بس أنا عايزة أطلب منك طلب صغير.
— قولي.
— يوم الجمعة، قبل ما أمشي، عايزة نقعد أنا وإنت ونجلاء قعدة بسيطة.
اتغير وشه.
— ليه؟
— علشان أسيب البيت وأنا مطمنة، وأعرف هي محتاجة إيه.
قال بسرعة:
— مفيش داعي للكلام الكتير ده.
قلتله:
— ده أقل حق ليا، مش كده؟
فضل باصصلي ثواني.
وبعدين قال:
— ماشي… بس من غير مشاكل.
ابتسمت.
— متقلقش، مش هيحصل أي مشاكل.
لكنه مكنش يعرف إن أخويا طارق كان بيجهز مفاجأة تانية.
وإن المفاجأة دي ممكن تكشف سر أخطر من موضوع بنت خالته بكتير!
يوم الجمعة جه.
صحيت من بدري.
عملت الفطار، ونضفت البيت، وجهزت شنطة صغيرة وحطيتها جنب الباب.
محمود كان بيتحرك في الشقة بنشاط غريب.
غير ملايات أوضة الضيوف، وجاب ورد جديد، وطلب مني أجهز أحسن طقم كوبايات.
بصيتله وقلت:
— واضح إنك مهتم بالضيفة أوي.
قال بضيق:
— هالة، بلاش تلميحات.
مردتش.
الساعة سبعة بالليل، جرس الباب رن.
فتحت.
كانت نجلاء واقفة قدامي.
لابسة طقم شيك، وحاطة مكياج كامل، وشايلة شنطتين كبار.
ابتسمتلي وقالت:
— معلش يا حبيبتي، هنتعبك معانا.
قلت وأنا بوسع لها الطريق:
— تعبك راحة يا نجلاء… اتفضلي.
دخلت وهي بتبص في كل ركن من أركان الشقة.
وبعدين سألتني:
— إنتِ جهزتي شنطتك؟
قلت:
— أيوه.
ابتسمت.
— كويس… علشان أنا محتاجة أرتاح بدري.
محمود خرج من أوضتنا أول ما سمع صوتها.
— نجلاء! حمد لله على السلامة.
ردت بابتسامة واسعة:
— الله يسلمك يا محمود.
بصيت عليهم.
كان فيه ألف سؤال جوايا.
لكن فضلت ساكتة.
قعدنا في الصالون.
محمود بص في ساعته أكتر من مرة.
وبعدين قال:
— هالة، مش هتتحركي؟ الوقت اتأخر.
