شقا العمر منال علي 2
نهى بدأت تعيط بهستيريا:
طارق اسمعني بس… عشان خاطري أنا عملت كدة عشان نتجوز، عشان نلاقي حتة تجمعنا!
طارق قلع الدبلة من إيده ورماها على الأرض تحت رجليها:
أنا أتجوز في عشة على السطوح بحلال ربنا… ولا أدخل قصر مسروق من دم شقا أختك! الجوازة دي باطلة، ودبلتك اهي، وكل حاجة بيننا انتهت، ومش عايز أشوف وشك تاني ليوم الدين!
أبوه وأمه لفوا ضهرهم وخرجوا، وطارق وقف على الباب وبصلي باحترام:
حقك عليا يا أبلة هدى… وإحنا بريئين من الأشكال دي.
ونزل وسابها.
الباب اتقفل وراهم، وفضلنا أنا وهي في الشقة لوحدنا.
نهى كانت واقعة على الأرض، بتعيط وبتصرخ، بتبص للدبلة المرمية في التراب، وبتبص للعفش اللي ملحقش يتهنى بيه حد.
رفعت راسها وبصتلي بعينين مليانة سم وغل:
ارتحتي؟! خربتي بيتي؟! بوظتي جوازتي وفرحة عمري؟! منك لله يا شيخة، منك لله!
مشيت خطوتين وقفت قدامها، وبصيت في عينيها من فوق:
أنا مخربتش بيتك يا نهى… إنتي اللي بنيتي بيتك على أنقاض بيتي وشقايا… إنتي اللي دوستي على الأخت اللي ربتك وسابت اللقمة من بقها عشان تديهالك… إنتي اللي نسيتي ربنا، وفاكرة إن الورقة دي هتحميكي من دعوة مظلوم.
قالت وهي بتنهج من العياط والذل:
مش هتاخدي الشقة برضه! هفضل قاعدة فيها، ومش هتنازل، وهخليكي تموتي بحسرتك!
ابتسمت بمرارة وطلعت تليفوني:
براحتك يا نهى… بكره الصبح هيكون جوزي هنا في مصر، وطارق المحترم سجل كل اعترافاتك دلوقتي بصوته وصوت أهله، ولو الشقة دي متنازلتيش عنها في الشهر العقاري بكره الساعة تسعة الصبح برضاكي وبشهود، أنا هرفع قضية خيانة أمانة ونصب، وهفضحك قدام المنطقة والعيلة كلها، وهخليكي تمشي في الشارع والناس بتشاور عليكي وتقول النصابة اللي سرقت أختها… واختاري بقى تتنازلي بالهدوء وتستري نفسك، ولا تدخلي السجن وتتفضحي فضيحة متتلمش طول عمرك؟
نهى بصتلي برعب… كانت أول مرة تشوف الوش ده مني.
عرفت إن خلاص، كل الحبال اتقطعت، وإن البنت الصغيرة الساذجة اللي كانت بتستغل طيبتها ماتت ومبقاش ليها وجود.
نزلت راسها في الأرض، وبصوت مخنوق ومكسور قالت:
هتنازل… بس مش عايزة أشوف وشك تاني، إنتي مش أختي.
قلتلها والدمعة نزلت من عيني غصب عني، دمعة وجع على الأخوة اللي ماتت:
إنتي اللي قتلتي الأخت دي من يوم ما قلتي شقتنا ببرود… من اللحظة دي، إنتي بالنسبالي واحدة غريبة ماليش صلة بيها.
