بنتي الصغيرة الكاتب إسلام أحمد

صحيت فجأة بالليل لقيت بنتي اللي لسه طفلة حاطة السك..ينة علي رقبتي!!, برقت وقومت علي حيلي و مسكت ايديها وانا بقولها بخضة و صدمة!!" بتعملي ايه يا حبيبتي!؟", ابتسمت ليا ابتسامة مرعبة و قالت " كنت عايز اد.بحك يا ماما زي ما عمو بيد.بح الفرخة", استغربت جدا من كلامها و قلبي بدأ يدق, اخدتها من ايديها و رجعتها تاني فرشتها و انا مصدومة من اللي حصل منها و مش قادرة استوعيب اللي عملتوا و اللي قالته, ليه بنتي تعمل حاجة زي كده!!! عدى كام يوم وأنا بحاول أقنع نفسي إن اللي حصل ده كان مجرد كابوس، أو إن البنت شافت حاجة في التلفزيون وبتجربها ببراءة الأطفال... بس نظراتها ليا مكنتش براءة خالص. نظرتها بقت باردة، وفيها لمعة غريبة مش بتاعة طفلة في سنها أبدًا. بعد الموقف ده بليلتين، كنت واقفة في المطبخ بجهز الغدا، والزيت كان بيغلي على البوتاجاز. لفيت ضهري ثانية واحدة عشان أجيب طبق، وفجأة حسيت بحركة سريعة ورايا. ببص لقيتها واقفة فوق الكرسي الخشب الصغير بتاعها، وإيديها ممدودة بكل قوتها ليد الطاسة عشان تقلب الزيت المغلي عليا! لحقتها في آخر ثانية، زقيت إيديها وزعقت بجنون: "أنتي بتعملي إيه؟! كنتي هتحرقيني!" بصتلي بنفس الابتسامة الباردة وقالت بصوت هادي وهي بتميل راسها: "كنت هعملك بطاطس محمرة يا ماما.. مش أنتي بتحبيها؟" جسمي كله اتنفض، ومبقتش عارفة هل هي قاصدة تأذيني ولا في حاجة غلط بتحصل معاها؟ الموضوع ملوش علاقة بالبراءة.. في ليلة تانية، صحيت على صوت تزييق خفيف في الصالة. قمت براحة وبصيت من ورا الباب، لقيتها قاعدة في الضلمة الكحل، وماسكة مقص كبير من بتوع المطبخ، وبتقص في لبسي اللي كناه على الشماعة... بس مبتقصوش عشوائي، دي كانت بتقص مكان "الرقبة" و"القلب" بالظبط! الصدمة الحقيقية بقى، والحدث اللي خلاني أحس إن روحي بتتسحب مني، حصلت النهاردة الفجر... صحيت على كتمة نفس رهيبة، كأن جبل نازل على صدري ومش قادرة أتنفس خالص. فتحت عيني بالعافية في ضلمة الأوضة، لقيت بنتي قاعدة بكامل جسمها فوق صدري، كاتمة نفسي بمخدة السرير وبكل قوتها، وفي الإيد التانية ماسكة تليفوني... حاولت أقاومها وزقيتها بكل قوتي لغاية ما وقعت على الأرض، وقعدت أتكح وأخد نفسي وأنا بترعش. نورت أباجورة السرير بسرعة وأنا بصرخ فيها: "حرام عليكي! أنتي عايزة مني إيه؟!" البنت مكنتش بتعيط، كانت بتبصلي بنظرة كلها غل، ورفعت التليفون في وشي.. شاشة التليفون كانت منورة على تسجيل صوتي شغال، وصوت بنتي الصغير طالع منه وهي بتقول بنبرة مرعبة: "خلاص يا عمو.. أنا بعمل اللي اتفقتوا عليه.. ثواني وهتكون ماتت." وفي اللحظة دي، سمعت صوت قفل باب الشقة الرئيسي وهو بيتفتح براحة من برة.. وفي حد خطوته بدأت تقرب من أوضتي! مسحت من دماغي فكرة إن في حد برة الشقة، وقفلت باب الأوضة بالمفتاح وأنا إيدي بتترعش والتليفون وقع مني على الأرض. الصوت اللي كان في التسجيل مكنش صوت بني آدم بيكلم بني آدم.. النبرة التانية اللي كانت بترد عليها في التسجيل، لما ركزت فيها قبل ما التليفون يفصل، مكنتش نبرة "عمو" خالص.. دي كانت أشبه بفحيح أفعى أو صوت جاي من البئر، صوت ملوش ملامح بشرية. التفتت لبنتي وأنا ضهري ساند على الباب، لقيتها قاعدة على الأرض مربعة رجليها، وراسمة على وشها نفس الابتسامة الباردة. سألتها بصوت مخنوق من الرعب: "أنتي كنتي بتكلمي مين يا حبيبتي؟ مين اللي جوه التليفون؟" بصتلي وعينيها فجأة واسعة بشكل مش طبيعي، النني الأسود بتاع عينها حسيت إنه كبر وبلع البياض كله، وقالتلي بصوت هادي وراسي جداً: "هو مش جوه التليفون يا ماما.. هو واقف وراكي دلوقتي.. وبيقلي إنك قفلتي الباب عليا وعليها.. بس نسيتي تقفليه عليه هو." جسمي كله قشعر، ودمي اتجمد في عروقي. حسيت ببرودة مرعبة ورا ضهري، كأن في تيار هواء تلج طالع من الخشب بتاع الباب اللي أنا ساندة عليه. لفيت براحة وأنا مرعوبة.. مكنش فيه حد. بس لما بصيت على الأرض.. شفت الصدمة اللي خلت ركبي تخونني وأقع مكاني. اللمبة الضعيفة بتاعة الأوضة كانت عاكسة ضلي على الأرض.. وجنبه، كان فيه ضل تاني.. ضل طويل وضخم، ملوش ملامح واضحة، بس واصل لغاية السقف، ومادد إيده الضل دي ومثبتها فوق راس بنتي مباشرة.. كأنه خيوط ماريونيت خفية هي اللي بتحركها! وفجأة، البنت قامت وقفت من غير ما تستخدم إيديها، كأن في قوة شدتها لفوق، وبدأت تقرب مني بخطوات بطيئة، وهي بتقول بنبرة صوت غريبة.. صوتها هي بس مدموج معاه صدى صوت تاني تخين ومرعب: "هو بيقولك.. بلاش تروحي الشغل بكرة.. عشان البيت هنا هيبقى أظلم.. وأظبط." الليل مكنش بيعدي، والأيام اللي وراه بقت زي الجحيم. بقيت عايشة مع بنتي في بيت واحد بس حاسة إني محبوسة مع كائن غريب مش عارفاة. محاولاتها ملقلتش، بالعكس، بقت أذكى وأخطر، وكلها بتحصل في هدوء مريب. في يوم، كنت قايمة من النوم هلكانة، دخلت الحمام أغسل وشي.. أول ما فتحت الحنفية ونزلت المياه على وشي، حسيت بلسعة نار! صرخت وبصيت في المراية لقيت وشي أحمر وبيطلع منه دخان. البنت كانت واخدة مية النار اللي بنظف بيها الحوض، ومفضياها في الفلتر بتاع الحنفية! بصيت ورايا لقيتها واقفة عند باب الحمام، عينيها واسعة ومبرقة، والضل الطويل الخفي ده كأنه محاوطها من كل ناحية. سألتها بصرخ: "ليه؟! هتموتيني يا بنتي؟!".. ردت بكل برود: "هو قالي إنك لو شيلتي الوش ده.. هترجعي تضحكي تاني." مبقتش قادرة أستحمل.. الرعب النفسي كان بيموتني بالبطيء. الضل الخفي ده كان بيظهر في كل مكان، على حيطة الصالة، ورا ستارة الأوضة، كأنه مسيطر على عقلها تماماً وبيحركها زي العروسة اللعبة عشان تخلص مني. لحد ما جه اليوم المشؤوم.. اليوم اللي كل حاجة فيه اتكشفت. كنت قاعدة في الصالة، وضهري وجعني جداً من قلة النوم. بنتي دخلت عليا المطبخ، وجابتلي كباية عصير ليمون. قعدت جنبي وبصتلي بنظرة رقيقة بقالي شهور مشوفتهاش، وقالتلي بصوتها الطبيعي بتاع زمان: "اشربي ده يا ماما عشان ترتاحي.. أنتي تعبانة أوي." أنا من كتر اشتياقي لحضنها وبراءتها، صدقتها. أخدت الكباية وشربتها كلها.. بس بعد خمس دقائق بالظبط، حسيت بنغزة في قلبي.. نغزة قوية لدرجة إني مكنتش قادرة أخد نفسي، وجسمي كله بدأ يتشنج وأقع من على الكنبة على الأرض. بنتي وقفت فوق راسي، وبدأت تضحك.. بس المرة دي مكنتش ابتسامة باردة، دي كانت بتضحك بهستيرية، والضل وراها ع الحيطة بيتحرك ويوطي عليها. وأنا بلفظ أنفاسي الأخيرة وبطلع تليفوني عشان أطلب الإسعاف، إيدي خبطت في اللاب توب بتاعي اللي كان مفتوح على المكتب الصغير جنب الكنبة. الشاشة نورت.. وجت على الفايل اللي أنا كنت شغال عليه بقالي سنة.. في اللحظة دي، وأنا بموت، الصدمة الحقيقية فوقتني.. صدمة أقوى من السم اللي بيجري في دمي. بصيت على الشاشة، وبعدين بصيت لبنتي.. وبدأت أفتكر.. أفتكر كل حاجة! أنا مكنتش بشتغل في شركة.. أنا دكتورة وأخصائية نفسية، وكنت بكتب بقالي سنة "رواية رعب نفسية" عن طفلة ممسوسة بكيان خفي بتحاول تقتل أمها بكل الطرق دي! بنتي مكنتش بتعمل كدة عشان في "كيان خفي" بيحركها.. الكيان الخفي ده كان "أنا".. كان عقلي أنا! بنتي شافتني وأنا بنفصل عن الواقع وبقرا السطور دي بصوت عالي في الليل.. شافتني وأنا بجرب في الأوضة الضلمة إزاي أمثل دور الضل عشان أعيش الحالة وأنا بكتب.. بنتي طفلة، وعقلها الصغير استوعب إن ده "اللعب" اللي ماما بتحبه.. إن دي الطريقة الوحيدة اللي تخلي ماما تهتم بيها وتبصلها وتتفاعل معاها، بعد ما اللاب توب والكتابة سرقوني منها! هي مكنتش بتقتلني كرهًا.. هي كانت بتنفذ السيناريو اللي أنا كتبته بإيدي، سطر بسطر، عشان ترضي "هوس" أمها! وقبل ما عيني تقفل تماماً، لقيتها بتوطي عليا، وبتقولي ببراءة مرعبة وهي بتمسح دموعي: "أنا خلصت الجزء الأول من الرواية بتاعتك يا ماما.. مش أنتي اللي كتبتي إن الأم هتموت في الآخر؟!" و بفتح عيني وانا في المستشفي , بكون مستغربة اني لسه عايشة , بلاقي صحبتي و اهلي جنبي , صحبتي بتقولي حمدلله علي سلامتك, و بقولها ايه اللي حصل , قالتلي اني كنت في غيبوبة بقالي اسبوع, سألت عن بنتي , لقيتهم كلهم بصوا لبعض , ولقيت صحبتي هند قالت بأستغراب"بنتك!؟ ..بنتك مين؟.. انتي لسه متجوزتيش يا حبيبتي اصلا", امي في اللحظة دي بتتكلم بحزن وشفقة وبتقول " انا قلتلك يا بنتي ان الكتابة في القصص والحكايات دي هتأثر علي دماغك واهو حصل", صحبتي بتكلم في الوقت دا وبتقول " راوية ابنتي الممسوسة مكسرة الدنيا و عاجبة ناس كتير". تمت بقلمي اسلام احمد مستوحاة عن احداث حقيقية و لو وصلتوا لحد هنا هكون مستني رايكم

مقالات ذات صلة

رواية زهرة وزين

قصة”عبد الرازق درويش” للكاتب مصطفى_ايمن_شحاتة

حكاية فهد

زوجي وعائلته

حكاية عمر ومريم 2

صافية بنت الريف

اترك تعليقاً إلغاء الرد