سكنت ابن خالي
المحامي رد بقوة: “إحنا معانا أمر تنفيذ وإخلاء.. صاحبة البيت طلبت
استرداد ملكها فوراً.”
هناء صوتت: “إيه؟! ده بيتنا!”
وسيد نزل زعيق هو كمان: “إحنا قاعدين هنا بقالنا تلات سنين!”
المحامي رد بصوت واثق: “لو ملمتوش حاجتكم دلوقتي، البوليس هيشرف ويتم عمل محضر (طرد للغصب) وتعدي على ملكية غير.”
وفجأة.. الدنيا اتقلبت.
زعيق وصريخ.. والمنطقة كلها اتلمت تتفرج.. والجيران بيوشوشوا بعض:
— “مش دول اللي قالوا إنهم اشتلوه؟”
— “أتاريهم كانوا قاعدين ضيوف..”
— “يا دي الفضيحة!”
أنا كنت بسمع كل ده في صمت تام..
تليفوني مبطلش رن.. “سيد” بيكلمني مرة ورا التانية.. مردتش.
لحد ما ظهر اسم “عمتي”..
فتحت الخط، وسمعت صوتها زي التلج:
“عملتي إيه في ابني يا أميرة؟”
أول ما رديت على عمتي، مكنتش مستنية منها شكر، بس مكنتش متخيلة إنها هتقلب الحقيقة وتطلعني أنا اللي “ظالمة”.
عمتي بصوت عالي: “بترمي ابن خالك في الشارع يا أميرة؟ بعد ما عمر البيت وفتحلك بابه؟ ده بدل ما تشكريه إنه حماهولك من الحرامية!”
رديت عليها بكل هدوء: “حماه من الحرامية ولا سرقه هو يا عمة؟ ابنك ومراته طلبوا مني 50 ألف جنيه تأمين ليلة في بيت أبويا.. يعني بيأجرولي ورثي! تفتكري ده
يرضي ربنا؟”
سكتت لحظة، وبعدين كملت بجبروت: “وماله؟ مش قايمين بالبيت؟ مش هناء بتنضف وتكنس؟ ده حق مجهودها! رجعي الواد بيته يا أميرة وبلاش فضايح.”
هنا عرفت إن العرق دساس، وإن “هناء” متعلمة البجاحة من “كبيرتها”.
قلت لها كلمة واحدة: “البيت ده هيتقفل بالشمع الأحمر يا عمة، واللي له حق يروح للقضاء.” وقفلت السكة.
المواجهة على باب البيت
نزلت القاهرة وتاني يوم الصبح كنت قدام البيت. المنظر كان “يقطع القلب” بس بطريقة تانية.. العفش كان مرمي في المدخل، وهناء قاعدة عليه بتعيط “دموع تماسيح” عشان تلم الناس حواليها، وسيد واقف وشه في الأرض مش قادر يرفع عينه في عيني.
أول ما هناء شافتني، قامت زي القطة المذعورة:
— “عاجبك كده يا ست أميرة؟ فضحتيا وسط الجيران؟ بقى ده رد الجميل؟”
بصيت لها من فوق لتحت وقلت لها:
— “جميل إيه يا هناء؟ الجميل اللي هو إنك تغيري كوالين بيتي؟ ولا الجميل إنك تطلبي مني إيجار في ملكي؟ الفلوس اللي أنا حولتها لك دي.. كانت (تمن خروجك) من البيت، مش تمن إقامتي فيه.”
